லவ் யூ டாடி !!

அணைகின்ற விளக்கு

சுடர் விட்டு எரிவது போல்

இறப்பதற்கு முன் அவர் குரலில்

கடைசியாக சொன்ன வார்த்தை

எந்தன் பெயர் மட்டுமே,

நீங்கள் என்னை விட்டு சென்று

சரியாக 18 வருடங்கள் ஆகிவிட்டது,

தூங்குவோம் என கண்ணை மூடினால்

எந்தன் கனவுகளில் உங்கள் உருவம்

என் இரவு முழுவதையும்

உங்கள் வசப்படுத்திக்கொண்டது,

யாரோ ஒரு அப்பா தன் கால் வலிக்க

மிதிவண்டியை மிதித்து தன் மகனை

சொகுசாக கூட்டிச்செல்லும் போது இன்னும்

கொஞ்ச நாள் நான் மழலை வகுப்பில்

படித்திருக்கலாமோ என மனம் நாடுகிறது,

வெளியூரில் வேலை பார்த்தாலும்

சொந்த ஊருக்கு போய் புரோட்டா

சாப்பிடும் போதெல்லாம் ஞாயிற்று

கிழமை நீங்கள் வாங்கிக்கொடுக்கும்

புரோட்டா மட்டுமே கண்களின் முன்

வந்து செல்கிறது,

கேட்டவை எல்லாம் கிடைத்தது நடுத்தர

குடும்பத்தில் பிறந்தும் கூட நான் மட்டுமே

தனிக்காட்டு ராஜா நீங்கள் உடன் இருந்த

வரை,

அன்று நீங்கள் வாங்கிக்கொடுக்கும்

எனக்கு பிடித்த 50-50 பிஸ்கட்டுகளின்

சுவை இன்றைய தினத்தில் காலாவதி

ஆகிவிட்டது போல் அச்சுவையிலிருந்து,

ரஜினி படமென்றால் முதல் காட்சி

டிக்கெட்டை எப்படியாவது வாங்கி என்னை

கூட்டிச்சென்று அவரின் ஸ்டைலை ரசிக்க

வைத்தீர்கள் இன்றோ அந்த விண்டேஜ்

ரஜினியை கூட திரையில் பார்க்க

முடியவில்லை,

யாரோ முகம் தெரியாத உறவினர்கள்

கூட சொல்கிறார்கள் உங்கள் பெருமையை

ஹ்ம்ம் அவர்கள் வாயில் இருந்து நல்ல

விஷயம் வருவதே அரிது எப்படி இப்படி

ஒரு நற்பெயரை சம்பாதித்தீர்கள் என்ற

ஆச்சரியம் இன்று வரை எனக்கு இருந்து

கொண்டு தான் இருக்கிறது,

அது என்னமோ சரி தான்

நல்ல மனசு உள்ளவங்க

சீக்கிரமா தனக்கான இடத்த

தேர்ந்து எடுத்துப்பாங்கல ஹ்ம்ம்,

எந்த சூழ்நிலையிலும் கலங்காம

சிரிச்சிட்டே கடந்து போற மனநிலை

கூட உங்ககிட்ட கத்துக்கிட்டது தான்,

என்ன இப்போ நீங்க கூட இருந்திருந்தா

இந்த கொரோனா போன்ற கட்டுப்பாடு

விதித்த நாள்ல வீட்டுக்குள்ளேயே இருந்து

உங்க மடில படுத்து மனசு விட்டு பேச

கொஞ்சம் நேரம் கிடைச்சுருக்கும்,

சரி,எனக்கு கொடுத்து

வைக்கலன்னு நினைச்சுக்குறேன்,

கனவுல டெய்லி கால் பண்ணி

நீங்களும் அம்மாவும் பேசுவீங்களே

பத்து நிமிஷம் அது தொடரும்ன்னு

நினைக்குறேன்,

ஷேர் பண்ண நிறைய ஆசைகளும்

பிரியமும் இருக்கு மம்மியையும்

நல்லா பாத்துக்கோங்க,

ஹ்ம்ம், போங்க டாடி

அம்மா கூட ரொமான்ஸ் பண்ணுங்க

நீங்க வசிக்கின்ற அந்த மேல் உலகத்துல

சந்தோஷமா இருங்க,

என்ன பத்தி கவல படாதீங்க

கடைசி வர எந்த கெட்ட பழக்கத்துலையும்

என்ன நுழைச்சுக்கமாட்டேன் உங்களுக்கு

செஞ்சு கொடுத்த அந்த ப்ராமிஸ காப்பத்தி

இன்னார் பையன் - ன்னு உங்க பேர்

சொல்லும் பிள்ளையா தான் இருப்பேன்,

நீங்க சொல்லுவது போல

உலகம் ரொம்ப பெருசு தான் டாடி

ஆனா நிறைய வருஷம் போராடி

என்ன நான் இணைச்சுக்கிட்டேன்

ஊரோடு ஊராய் மனிதனோடு மனிதனாய்,

என்னால முடிஞ்ச வர

சின்னச்சின்ன அன்ப விதைச்சுட்டு

இருக்கேன் சில பேர சந்தோஷமாவும்

வச்சுக்குறேன் என்னோட எழுத்து மூலமா,

என்ன சுத்தியே உங்க தேடல் இருக்கும்

என்னோட தேடலும் நீங்களும் மம்மியும்

மட்டும் தான்,

நீங்க தான் எல்லாமே

நீங்க தான் எல்லாமுமே,

நைட் கால் பண்ணுங்க

கதைக்க ஓராயிரம் கதைகள் இருக்கு,

~ லவ் யூ டாடி ( சின்ன சிரிப்புடன் ) ❤️